|
காதலர் இல்லாத இப்போது, கொலை செய்யும் இடத்தில் பகைவர் வருவது போல் மாலைப்பொழுது ( என் உயிரைக் கொள்ள) வருகின்றது.
|
|
பரிமேலழகர் உரை (Parimelazhagar Definition):
|
|
(இதுவும் அது.) மாலை - காதலர் உள்ள பொழுதெல்லாம் என் உயிர் தளிர்ப்ப வந்த மாலை; காதலர் இல்வழி - அவர் இல்லாத இப்பொழுது; கொலைக்களத்து ஏதிலர் போல வரும் - அஃது ஒழிந்து நிற்றலே அன்றிக் கொல்லுங்களரியில் கொலைஞர் வருமாறுபோல அவ்வுயிரைக் கோடற்கு வாராநின்றது. (ஏதிலர் - அருள் யாதுமில்லார். 'முன்னெல்லாம் எனக்கு நட்பாய் இன்பஞ்செய்து வந்த பொழுதும், இன்று என்மேற் பகையாய்த் துன்பஞ்செய்து வாரா நின்றது. இனி யான் ஆற்றுமாறு என்னை'? என்பதாம்.)
|
|
மணக்குடவர் உரை:
|
|
காதரில்லாதவிடத்து இம்மாலைப்பொழுது கொலைக் களத்துப் பகைவரைப்போல வரும். இது மாலைக்காலத்து நோய் மிகுதற்குக் காரணமென்னை யென்ற தோழிக்குத் தலைமகள் காரணங்கூறியது.
|
|
தேவநேயப் பாவாணர் உரை:
|
|
மாலை-காதலர் உடனிருந்த நாளெல்லாம் என் உயிர் தளிர்ப்புற வந்த மாலை, காதலர் இல்வழி -அவர் , நீங்கியவிடத்து;கொலக்களத்து ஏதிலர் போல வரும் -கொலைக்களத்திற் கொலைஞர் வருவது போல என்னுயிரைக் கவர வரும். இதனால் நான் ஆற்றுமா றெங்ஙனம் என்பது குறிப்பெச்சம்.ஏதிலர் ஏதும் அன்பிலாதவர்.
|
|
கலைஞர் உரை:
|
|
காதலர் பிரிந்திருக்கும்போது வருகிற மாலைப் பொழுது கொலைக் களத்தில் பகைவர் ஓங்கி வீசுகிற வாளைப்போல் வருகிறது.
|
|
சாலமன் பாப்பையா உரை:
|
|
அவர் என்னைப் பிரியாமல் என்னுடன் இருந்தபோது எல்லாம் என் உயிர் வளர வந்த இந்த மாலைப் பொழுது, அவர் என்னைப் பிரிந்து இருக்கும் இப்போது, கொலைக் காலத்திற்கு வரும் கொலையாளிகள் போலக் கருணை இல்லாமல் வருகிறது.
|
|
நாமக்கல் கவிஞர் வெ. இராமலிங்கம் பிள்ளை உரை:
|
|
காதலர் என்னுடன் இல்லாத காரணத்தால் இந்த மாலைப்பொழுது, போர்க்களத்தில் பகைவர்கள் சீறி வருவதுபோல் என்மீது சீறி வருகிறது.
|
|
திருக்குறள் வீ. முனிசாமி உரை:
|
|
காதலர் இருந்தபொழுதெல்லாம் எனது உயிர்தழைக்கும்படியாக வந்த மாலைப் பொழுது அவர் இல்லாத இப்போது கொலை செய்கின்ற களத்திற்கு வருகின்ற கொலைஞர்களைப் போல வருகின்றது.
|
|
தமிழ்க்குழவி உரை:
|
|
காதலர் பிரிந்திருக்கும் காலத்தில் வருகின்ற மாலைப் பொழுது, கொலைக்களத்தில் காணும் கொடியவர் போல என்முன் வருகிறது.
|
|
Translation
|
|
When absent is my love, the evening hour descends,
As when an alien host to field of battle wends.
|
|
Explanation
|
|
In the absence of my lover, evening comes in like slayers on the field of slaughter.
|
|
Transliteration
|
|
Kaadhalar Ilvazhi Maalai Kolaikkalaththu
Edhilar Pola Varum
|
|
|
திருக்குறள் ஓவியம்: ஓவிய ஆசிரியர் திரு.செ.நடராசன், நல்லூர் விஜயாபுரம்
|
|
|
